Medo me da o elitismo
Artigo publicado na opinión da Coruña por Antón Luaces. Como sempre, deacordo con el pero con matices, que vos parce?
A Sinfónica de Galicia é elitista. Quedo con este titular que se tira da entrevista publicada o luns en La Opinión. É tan elitista a Sinfónica que é a única formación das súas características que enche o Palacio da Ópera -cuxa capacidade, por certo, resultou excesiva para algúns partidos cando celebraban aquí un mitin na campaña- con semanas de antelación na temporada de concertos.
Tamén é a única que se permite encher María Pita cando participa nas festas. Di a concelleira que é elitista e custa cartos: eis unha das cousas polas que os galegos somos distintos aos cataláns e a calquera comunidade europea, que acariñan todo o que significa cultura, por máis custo que teña. Unha cultura, a nosa, que emana do pobo e que o pobo pode facer súa co esforzo propio de pagar as taxas que paga ao concello que mantén a orquestra, ou á Xunta que nos abeira.
Tamén serven estes cartos públicos para aboar os salarios que os concelleiros se autoadxudican, sen que ningún patrón ou norma de traballo estableza contías. Resultan caros e elitistas os políticos, nomeadamente os municipais? Elitista, di a concelleira de Cultura. Supoño que será unha chamada de atención para que os responsables da Sinfónica poñan a remollo as súas barbas e lembren o acontecido ao Ballet Galego Rey de Viana, defenestrado por ser a representación da elite dun pobo, o galego , que soubo saborear os éxitos desta formación de baile e coreografía galegos en Tokio, Nova York, Madrid, Carballo, Vigo, Ribeira, Berna... Saír da aldea de un para coñecer o que hai fóra nunca foi malo de todo.
Como galego prefiro pagar unha entrada para un concerto da Orquestra Sinfónica de Galicia (unha formación nosa que representa a Galicia e á Coruña en cada actuación, como fixo o Rey de Viana) a perdela porque unha concelleira de Cultura di que é elitista e cara. A cultura nace na base, non na elite.
Unha orquestra como a nosa Sinfónica contribúe a que esa base sexa máis ampla cada día. Acaso non son a elite os políticos? Son caros e, polo tanto, é cara a democracia con cultura? É menos elitista e menos cara a Cidade da Cultura?
1 comentario
Bi -
(Gran artículo, como todos los demás)
Por cierto, se echaron de menos tus tonterías por tierras aragonesas ;)